COMO ENFRONTAR A SITUACIÓN DE CONFINAMENTO NA CASA CON NENAS E NENOS

1. EXPLICARLLE A SITUACIÓN. SE A COMPRENDE VAINA ACEPTAR MELLOR

Contarlle a verdade sen catastrofismos e comentarios esaxerados. Valernos dos contos, vídeos  e historias que temos nos diversos blogs, incluído o da biblioteca.

Dar a información axeitada á idade e capacidade de comprensión.

Facerlle ver que se cumprimos co confinamento estamos axudándonos e axudando ao resto da xente a non contaxiarse.

Falar con positividade do tema.

2. FIXAR RUTINAS NOVAS

Estamos nunha situación diferente á habitual.
Cómpre establecer novos horarios, rutinas,... e facelo de maneira conxunta, equilibrada e igualitaria.

Planificar e consensuar vainos axudar a respectar espazos, tempos e necesidades,... Vainos axudar no aprender a decidir e opinar,  ao tempo que previmos conflitos innecesarios (conflitos xurdirán, son connaturais á convivencia, o importante é xestionalos adecuadamente, aprender a resolvelos: escoitar e falar son as bases dunha adecuada resolución de conflitos).

Como suxestión teremos: horario de lecer, de colaboración no fogar (evitando roles sexistas e educando na igualdade), de fala conxunta, de lectura/escritura/repaso escolar, de momentos especiais para cadaquén, ...

Teremos horarios, pero todo sen agobio, pensados con flexibilidade e adaptables a cada situación familiar. Non existe un horario ideal para toda a xente. Cada familia ten o seu propio ritmo e necesidades.

3. INFORMARNOS SOBRE A PANDEMIA  DE XEITO ADECUADO E POR FONTES OFICIAIS

Evitemos a sobreinformación e sobre todo os bulos e alarmismos.

As fontes oficiais son a mellor maneira de informarse.

Hai guías interesantes neste senso.

4. COIDAR O ESTADO DE ÁNIMO É FUNDAMENTAL

Ser positivas e positivos.

Evitar obsesionarse.

Manter hábitos saudables como: dieta equilibrada, horario de sono adecuado, hábitos de hixiene, exercicio lixeiro e dentro das posibilidades, acceso á luz natural cando menos uns minutos diarios,...

Manter o humor. Buscar momentos para gozar en familia.

5. APRENDER A COIDARSE E A COIDAR É TAREFA DE TODAS E TODOS 

O contexto vai permitirnos traballar múltiples aspectos relacionados co coidado, coa autonomía, coa prevención e seguridade, co autocoñecemento,...

Coidarse e dispensar coidados ao resto da familia é tarefa de todas e todos sen distinción de sexo. Os coidados son un ámbito máis de corresponsabilidade que se aprende dende pequenas e pequenos.

6. NON É NECESARIO TER ACTIVIDADE, DIVERSIÓN  OU TRABALLO TODO O TEMPO

Haberá momentos do día nos que será mesmo adecuado aburrirse.

Inda que procuremos ter ocupación... Tampouco hai que pasarse. Aburrirse de cando en vez é normal.

Non hai por que estar a todas horas facendo algo. Evitar a sobreactividade.

7. SE NON PODEMOS SAÍR... QUE COUSAS QUE NON PODÍAMOS FACER ANTES PODEMOS AGORA?

Ser positivas e positivos e atopar cousas diferentes que non tiñamos tempo de facer antes e que agora poderemos:

- xogar máis tempo xuntas e xuntos, evitando estereotipos sexistas en xogos e xoguetes.

- dialogar máis

- pasar máis tempo en familia.

- facer "xx" que sempre dicía que nalgún momento faría ou fariamos conxuntamente.

- aprender a... (pintar, coser, facer un vídeo, cociñar, ...). Aprender cousas novas sen distinción de sexo, toda actividade é igualmente válida para nenas e para nenos.

8. NON DEIXAR DE SOCIALIZAR, DE MANTER O CONTACTO. FOMENTAR AS RELACIÓNS AFECTIVAS 

Inda que esteamos na casa temos que procurar seguir mantendo contacto coa familia, amizades, veciñanza, compañeiras e compañeiros,...

Non é necesario saír da casa, temos moitos recursos para facelo.

Podemos usar as redes, neste caso é un bo momento para lembrar como debe ser o seu uso adecuado, respectuoso, solidario, non aditivo e saudable.

ÁNIMO! IMOS CONSEGUIR PARAR AO VIRUS!

QUEDEMOS NA CASA