RACHA CO ACOSO

NON SEXAS CÓMPLICE!
RACHA CO ACOSO!

HAI VARIOS TIPOS DE ACOSO E TI PODES FACER QUE NON EXISTA.

RACHAR COS ESTEREOTIPOS DE XÉNERO: CORRESPONSABILIDADE

O XOGO NON DEBE TER XÉNERO: XOGUEMOS CREANDO IGUALDADE.

O xogo é para as nenas e para os nenos unha maneira de entender a realidade e apropiarse dos costumes sociais.

Dende pequenas e pequenos a familia e o entorno promoven maneiras de actuar e dan modelos de estar.  Podemos facelo en pé de igualdade ou non.

Se diferenciamos coa elección da cor do cuarto, da roupa, do tipo de xogos e xoguetes, estamos promovendo diferenzas futuras. Para ninguén é un segredo que a familia e os círculos sociais onde nos movemos celebran o nacemento dunha nova criatura (e mesmo antes de que naza) asignándolle de maneira estándar formas de vestir, cores de roupa. cores de cuarto, deseños das sabas e mantiñas, os xoguetes e os peluches,...

Por que azuis para os nenos e rosas para as nenas? Por que non de moitas cores diversas e variadas en gamas e tons?

Por que coches para uns e bonecas para as outras? Acaso non levan coches as mulleres, acaso non coidan bebés os homes?

Ás veces semellan pequenos detalles, pero son eses os que salientan diferenzas e reforzan estereotipos e roles que implican desigualdades de xénero.

Cos xogos aprenden a imitar ás persoas adultas, pero tamén aprenden habilidades concretas e potencian determinadas capacidades. Por que imos potenciar unha parte delas e desbotar outras? Os xogos permiten que aprendan cousas da realidade, que establezan vencellos co cotiá, que comecen a formar afinidades, que exploren habilidades motrices, sociais, somáticas, psíquicas e fisiolóxicas... como impedirlles unha experiencia rica e variada? Por que limitar as experiencias a uns xogos e xoguetes concretos?

Deberiamos cuestionarnos eses costumes de diferenciar por cores, por xoguetes, por xogos ... e potenciar o pensamento crítico, que as nenas e os nenos entendan que non hai cousas para nenas e cousas para nenos, se non que poden xogar con todo.

Na construción dun mundo máis xusto e máis igualitario, no que se respecten os dereitos das persoas, a eliminación de estereotipos de xénero é fundamental.

Pretendemos unha sociedade de corresponsabilidades no fogar e fóra, como podemos entón pedirlle a unha nena que non xogue con coches, ferramentas, bloques de construción? como pedirlle a un neno que non manexe a cociñiña, vista unha boneca, faga compras...? como podemos solicitar a unha nena que non xogue ao fútbol e a un neno que non faga ximnasia rítmica? Todos os xogos e xoguetes proporcionan habilidades, desenvolven creatividade, axudan a comprender as funcións das cousas,...

A sociedade cambia e os roles a desenvolver son válidos para todas e todos, como pedirlle ás nenas e aos nenos que non interactúen cos diferentes obxectos e prácticas sociais?

O xogo permite vivenciar situacións do cotiá, recoñecer o mundo, explorar de diferentes maneiras o espazo, o tempo e os obxectos, Cada xogo e cada xoguete ten as súas características e privar ás nenas e aos nenos dalgún deles significa cortarlles un cacho de experiencia, estimulación e exploración necesarias para vivir no mundo actual.

As nenas e os nenos non teñen prexuízos ante obxectos, xogos e xoguetes, somos as persoas adultas as que caemos na trampa dos prexuízos e ensinamos erroneamente que determinado xogo ten que asignarse a un sexo específico; somos as adultas e os adultos que de maneira coercitiva acoutamos a exploración das súas habilidades para un xogo ou outro. Temos un papel fundamental na construción da identidade das nenas e dos nenos, somos nas súas aprendizaxes o pivote que permite e acompaña as súas diferentes experiencias lúdicas, a exploración do medio, as fantasías, as inquedanzas, os desexos, as investigacións, as lecturas, ...

Co xogo buscan diversión pero tamén aprendizaxe, por que non aprender a ser iguais dende a infancia?

Evitar estereotipos dende pequenas e pequenos axuda a unha vida adulta máis igualitaria.

REFLEXIONADO SOBRE A CORRESPONSABILIDADE DOMÉSTICA: A IGUALDADE

ADEMAIS DAS NOVAS DE PRENSA QUE ESTES DÍAS NOS ACHEGAN DATOS E FEITOS, PODEMOS USAR NA CASA COAS NENAS E COS NENOS CONTOS, IMAXES,... E VÍDEOS. ESTE PERMITE QUE DIALOGUEMOS SOBRE A TEMÁTICA NA CASA E NAS AULAS.